Perqué ua galeria deus artistas convidats per l’ACPPG desempuish 40 ans…
L’aprentissatge, e autanplan la transmission, que son las accions prumèras mesas en plaça a la creacion de l’ACPPG. L’idèia qu’èra de balhar dejà çò que sabèvam a partir de 1980, data deus prumèrs talhèrs regulars.
Puish la difusion de l’espectacle viu, l’organisacion d’estagis, d’exposicions, la collècta, que hascón plan viste partida integranta deu trabalh de cada jorn de l’associacion, en acòrd dambe’us objectius.
Per çò qui ei de la difusion, duas opcions se dessenhèn, en foncion deus projèctes e encontres : l’ACPPG, d’un costat, botèc en plaça lo son pròpi calendari d’espectacles – de 1 a 2 seradas cada an en mejana – e d’un aute costat trabalhèc o trabalha totjorn en collaboracion :
- dambe’u Collectiu Cultures Vivantes en Midi-Pyrénées, per viradas regionalas d’artistas convidats,
- dambe la Vila d’Aush, puish Circuits venguts Circa, dens lo cadre de la sua programacion annau,
- dambe l’Atelier-Théâtre de Mauvesin e lo Comité Départemental du Théâtre Amateur, per
representacions teatralas en occitan, catalan, espanhòl… - damb associacions : Associacion Perlinpinpin, Menestrèrs Gascons, Conservatòri Occitan (vengut COMDT), Larèrs Ruraus de Gèrs, ADDA de Gèrs, Eclats de Voix, Calandreta, Arpalhands, Trad’Envie… per projèctes mes o mens ponctuaus : talhèrs, Hèsta deu Rondèu, notadament.
Que vous convidam donc a descobrir mes de 40 ans de difusion d’espectacles e tanben d’encontres damb’artistas de cultura occitana e, per-delà, d’autas culturas !
